Tej neeg Australians uas tseem tab tom npaj yuav mus ncig txawv teb chaws ces xyov puas yuav muaj peev xwm ua tau raws li tej tswv yim tau npaj tseg lawm tom qab tau muaj cov kev ncua tej txheej txheem txheeb cov kev ua passport ntev heev.
Nom tswv hais tias lawv tseem tab tom txheeb xyuas ntau txheeb cov ntaub ntawv rau ib hnub twg - suav 16,417 daim uas tau txheeb rau hnub Tuesday dhau los thiab - vim rau qhov tias tom qab uas tau muab ciam teb kaw los tau 2 lub xyoos ces thiaj ua rau muaj neeg coob rov qab xav tau lawv tej passport dua.
Tsoom fwv tau hais tias lawv tau nrhiav 250 tus neeg ua hauj lwm mus pab txheeb xyuas tej ntaub ntawv uas tseem tsis tau txheeb, tab sis tsis yog tib co neeg xav mus holiday thiaj ntsib tej teeb meem no nkaus xwb.
Sreenith Kulangarath tau siv sij hawm 10 teev mus sawv ua nceeg tos ntawm lub chaw ua passport ntawm Sydney rau hnub Tuesday, thiab xav kom nws tau mus ntsib nws tus poj niam ntawm teb chaws India tom qab uas nws txiv tau tas sim neej rau hnub tim 1 lub 6 hli ntuj lawm.
Txawm tias nws tus poj niam tau siv cov fij dav hlau rau tib hnub uas nws txiv tas sim neej ntawd kom mus koom tau nws txiv lub ntsees los Mr Kulangarath tsis muaj peev xwm nrog nws mus tau.
"Kuv tus tub daim passport tag sij hawm lawm. Kuv tseem thov ib daig passport tshiab rau nws rau hnub tim 5 lub 5 hlis ntuj, tab sis yeej tseem tsis tau tau li," raws li nws tau qhia rau SBS News.
“Kuv tus poj niam twb ntsib teeb meem loj lawm - thiab nws xav tau kuv cov kev pab cuam. Kuv xav mus koom nrog nws thiab niam tais ua ke ntawm teb chaws India, tab sis kuv tsis muaj peev xwm mus tau yog tsis coj kuv tus tub mus thiab.
“Ces twb ua lub ntees rau hnub Friday no tab sis kuv twb mus koom tsis tau kuv tus poj niam li."
Yeej tau muaj tej neeg Australia ntau txheeb daim passport tag sij hawm siv rau lub caij tseem muaj kab mob COVID-19 kis thoob ntuj thaum uas tau txwv tsis pub neeg mus txawv teb chaws lawm.
Hos lub caij uas rov qab pib qhib Australia tej ciam teb rau thaum yuav xaus rau xyoo 2021 ntawd, ces yeej muaj neeg xa ntaub ntawv ntau heev mus thov passport ntawm Australia lub chaw ua passport (Australian Passport Office) thiab.
Tab sis lub tuam chav tswj dej num pej kum thiab lagluam (Department of Foreign Affairs and Trade - DFAT) yeej muaj peev xwm nrog xyuas kom ua tau sai rau cov neeg li Mr Kulangarath uas ntsib xwm txheej kub teb kub taw thiab.
Raws li lub tuam chav no lub vas sab tau qhia txog cov kev ua ib daim passport tshiab ces ''yeej muaj peev xwm ua tau rau lub sij hawm tsawg dua li 2 hnub xwb yog tias muaj laj thawj zoo txaus los yog muaj kev tu siab rau ib tug neeg twg lawm li muaj ib tug neeg ntawm tsev neeg txheeb ze yuav ntsib kev tas sim neej los yog muaj mob sab heev."
Thiab thaum Mr Kulangarath sau ntawv thov txuas passport rau hnub tim 2 lub 6 hli ntuj ces yeej tau teev tej no rau. Thiab tsuas them nyiaj li $225 ntxiv rau $155 dollar uas xa ntawv thov passport ntawd xwb.
Mr Kulangarath tau hais tias “Lawv qhia rau kuv tias yuav tau kuv tus tub daim passport rau lub sij hawm 2 hnub xwb. Thiab lawv yeej qhia rau kuv tias yuav muaj ib tsab email xa qhia txog kuv daim passport thiab yuav mus nqa li cas rau hnub Monday no."
"Tab sis kuv yeej tsis tau txais dab tsi rau hnub Monday li, ces kuv thiaj yuav tau rov qab tuaj sawv ua nceeg tos dua, thiab lawv mam qhia rau kuv tias xyov lawv muab kuv daim ntawv thov kom xub xub txheeb ua ntej ntawd tso qhov twg nrhiav tsis tau lawm."
Mr Kulangarath tau hais tias nws tsis yog tib tug uas tau mus tos sab nraum zoov ntawm ntawm lub chaw ua passport uas ntib tib cov teeb meem no nkaus xwb.
Nws hais tias "Muaj ib tug poj niam uas tseem tos txuas ntawm kuv qab hnub i los yeej ntsib tib cov xwm txheej muaj ntsis sib xws li kuv thiab."
"Nws tau thov dua ib daig passport tshiab ntawm lub chaw xav ntawv ob peb limtiam dhau los tab sis nws txiv twb tas sim neej ntawm teb chaws Aaskiv lawm."
"Nws tau qhia rau kuv tias nws tau tuaj rau ntawm lub chaw ua passport no kom ua tau nws daim passport sai kom thiaj tau rov qab mus koom nrog nws tsev neeg, tab sis kuj txheeb tau tias lub chaw ua passport no tsis tau txais nws daim ntawv ua nws xa rau lawv thiab."
Tim Watts uas yog tus neeg ua hauj lwm pab tus pwm tsav lis laj fai pej kum tau hais tias ''cov kev muab tej ntaub ntawv thov passport no ncua thiab lub sij hawm tos ntev es mam li tau ntsib lub chaw ua passport (Passport Office) mas yog tej yam tsis tsim nyog li."
Nws tseem tau hais ntxiv tias ''Yeej tau kwv yees tias yuav muaj tej teeb meem no thiab yog tus tsoom fwv dhau los tsis ua tib zoo nrog xyuas thiab npaj kom zoo tias tsam yuav muaj neeg xa ntaub ntawv thov passport siv coob thaum rov qab qhib ciam teb dua."
"Ua ntej yuav muaj kab mob kis thoob ntuj ntawd, ces yeej muaj tej ntaub ntawv xa mus thov passport ib hnub twg txog li 7,000 mus txog 9,000 tsab rau ib hnub twg diam. Tab sis tam sim no kiag ces twb muaj txog li ntawm 10,000 txog 12,000 tsab lawm, vim muaj ntau cov ntawv thov passport tsis tau xa rau lub caij muaj kab mob sib kis ces lawv thiaj xa mus thov tam sim no.
"Tsis tsim nyog neeg Australia yuav yog cov raug tej teeb meem los ntawm cov kev tsis ua tib zoo xyuas tej hauj lwm no li."
Nws kuj tau hais txhab ntxiv tias tus tsoom fwv no tau tab tom ''koom tes ua hauj lwm nrog DFAT kub siab ceev nrooj los xyuas kom txheeb tau tej ntau ntawv no kom ntau ntxiv thiab yuav nrhiav cov neeg los teb xov tooj thiab xyaum lawv kom sai li sai tau los ua tej hauj lwm no."
Senator Simon Birmingham uas yog tus nom ntawm lwm pawg fai kum xeeb uas lis dej num txawv teb chaws kuj tau qhia rau lub xov tooj cua 2GB rau hnub zwj Quag (Tuesday) tias: "Cia siab tias yuav ua txhua yam nrog xyuas kom muaj cov sij hawm ua hauj lwm ntau ntxiv, thiab muaj cov neeg ua hauj lwm teb xov tooj thiab pab cov system ntxiv."
"Txawm li cas los ntshe kuj yuav tsuas muaj peev xwm txheeb tau tej passport tsawg xwb thiab vim yuav tau txheeb cov kev ruaj ntseg thiab txheeb tau ntau ntawv nrog thiab yog tham txog tej neeg uas xub thov passport ua thawj zaug los sis yog tej passport uas thov rau me nyuam yaus ntawd."
"Tab sis qhov tseem ceeb tshaj ces lawv yuav tsum tau ua tib zoo xyuas kom muaj neeg teb xov tooj thaum muaj neeg ua tuaj thiab."
rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm ,, , thiab los yog download kom koj mloog tau SBS Hmong.
